సెక్స్ గురించి భర్తతో, భాగస్వామితో మాట్లాడటం: బ్రెస్ట్ క్యాన్సర్ తర్వాత

సెక్స్ గురించి మాట్లాడటం ఏ దంపతులకైనా కష్టమే. మన దేశంలో చాలా కుటుంబాల్లో దీని గురించి బహిరంగంగా మాట్లాడటం దాదాపు ఉండదు. బ్రెస్ట్ క్యాన్సర్ తర్వాత శరీరం, శక్తి, హార్మోన్లు, భావోద్వేగాలు అన్నీ మారినప్పుడు, ఈ సంభాషణ మరింత కష్టమవుతుంది — అదే సమయంలో మరింత ముఖ్యమవుతుంది.

తన భర్త లేదా భాగస్వామి తిరస్కరించబడినట్లు భావిస్తారేమో, ఆసక్తి కోల్పోతారేమో, దాంపత్యం ఎందుకు మారిందో అర్థం చేసుకోరేమో అని చాలామంది మహిళలు ఆందోళన పడతారు. మరోవైపు, నొప్పి కలిగిస్తానేమో, తప్పుగా మాట్లాడతానేమో, సున్నితంగా లేనట్లు కనిపిస్తానేమో అని భాగస్వాములు భయపడతారు. అందుకే వారు ఒక సంకేతం కోసం ఎదురుచూస్తారు — ఆ సంకేతం ఎప్పటికీ రాదు. ఈ మౌనం వల్ల ఇద్దరూ చెడునే ఊహించుకుంటారు. దగ్గరితనం అత్యంత అవసరమైన సమయంలోనే దూరం పెరుగుతుంది.

కొన్ని సులువైన మాటలతోనైనా సంభాషణ మొదలుపెడితే తరచుగా మనసు తేలికపడుతుంది. పడకగది బయట, ప్రశాంతమైన, ఏకాంత సమయాన్ని ఎంచుకోండి. నిందించకుండా మీ భావాల గురించి మాట్లాడండి. యోని పొడిబారడం, నొప్పి, అలసట, స్పర్శ తెలియకపోవడం వంటి శారీరక మార్పులను వివరించండి. మీకు ఇంకా ఏది నచ్చుతుంది, ఏది అసౌకర్యంగా ఉంది, ఇప్పుడు ఎలాంటి దగ్గరితనం కావాలి — ఇవి చెబితే మీ భాగస్వామికి సహాయం చేసే దారి దొరుకుతుంది. వారి ఆందోళనలు వినడం కూడా అంతే ముఖ్యం. దాంపత్యం అంటే కలయిక మాత్రమే కాదు, ఎన్నో రకాల ఆప్యాయత. దంపతులు తరచుగా దగ్గరవ్వడానికి కొత్త మార్గాలు కనుగొంటారు. మాటలు ముందుకు సాగకపోతే కౌన్సెలర్ సహాయపడగలరు.

చిన్నగా మొదలుపెట్టండి

అన్నీ ఒకేసారి మాట్లాడాల్సిన అవసరం లేదు. మొదటి సంభాషణ కేవలం తలుపు తెరిస్తే చాలు.

"నేను" అని మొదలయ్యే మాటలు వాడండి

"నాకు అనిపిస్తోంది", "నాకు లోటుగా ఉంది", "నాకు భయంగా ఉంది" అనే మాటలు, "నువ్వు ఎప్పుడూ ఇంతే" అనే మాటల కంటే వినడానికి తేలికగా ఉంటాయి.

మాట్లాడుతూనే ఉండండి

చికిత్స, కోలుకునే సమయంలో అవసరాలు మారుతూ ఉంటాయి. అందుకే తరచుగా ఒకరినొకరు అడిగి తెలుసుకోవడం సహాయపడుతుంది.

దగ్గరితనాన్ని మళ్లీ నిర్మించడంలో భాగస్వామి పాత్ర చాలా కీలకం.

ఆమెకు భరోసా ఇవ్వండి

ఒక సంపూర్ణ వ్యక్తిగా ఆమెను ప్రేమిస్తున్నారని, కోరుకుంటున్నారని, మచ్చలు లేదా శరీర మార్పులు దాన్ని మార్చవని ఆమెకు చెప్పండి.

ఓపికగా ఉండండి

కోలుకోవడానికి నెలలు పట్టవచ్చు. ఒత్తిడి పెట్టకండి, వేగాన్ని ఆమెనే నిర్ణయించనివ్వండి.

ఏది సహాయపడుతుందో అడగండి

ఏది బాగా అనిపిస్తుంది, ఏది అనిపించదు అని మృదువుగా అడగండి. ఆమె సమాధానాలను గౌరవించండి.

మీ భావాలూ పంచుకోండి

మీకు కూడా ఆందోళన, ఒంటరితనం, అయోమయం అనిపించవచ్చు. నిజాయితీగా, దయగా మాట్లాడుకోవడం మీ ఇద్దరికీ మేలు చేస్తుంది.

మీరూ సహాయం తీసుకోండి

భాగస్వాములకు కూడా కౌన్సెలింగ్ లేదా సపోర్ట్ గ్రూప్‌లు ఉపయోగపడతాయి.

దాంపత్యం గురించి మాట్లాడిన ప్రతిసారీ కన్నీళ్లతో, మౌనంతో లేదా గొడవతో ముగుస్తుందని కొందరు దంపతులు గమనిస్తారు. ఇది బయటకు చెప్పుకునే దానికంటే చాలా సాధారణం. దీని అర్థం మీ బంధం విఫలమవుతోందని కాదు.

విరామం తీసుకుని మళ్లీ ప్రయత్నించండి

సంభాషణ వేడెక్కితే, ఆపి, ఇద్దరూ ప్రశాంతంగా ఉన్న మరో రోజు మళ్లీ మాట్లాడదామని ఒప్పుకోండి.

రాసి చెప్పండి

కొందరికి తమ భావాలను ఉత్తరంగానో, మెసేజ్‌గానో రాయడం తేలిక. భాగస్వామి దాన్ని ఏకాంతంగా చదివి, తర్వాత స్పందించవచ్చు.

సమాచారంతో మొదలుపెట్టండి

క్యాన్సర్ తర్వాత లైంగిక మార్పుల గురించి ఒక కరపత్రం లేదా వెబ్ పేజీ కలిసి చదివితే, విషయం అంత వ్యక్తిగతంగా అనిపించదు, మాట్లాడటం తేలికవుతుంది.

ముందుగా నమ్మకమైన నిపుణులతో మాట్లాడండి

మీరు ఏమి చెప్పాలనుకుంటున్నారో సిద్ధం చేసుకోవడంలో బ్రెస్ట్ కేర్ నర్స్ లేదా కౌన్సెలర్ సహాయపడగలరు, లేదా మీరు మాట్లాడేటప్పుడు తోడుగా ఉండగలరు.

దంపతుల కౌన్సెలింగ్

ఇద్దరూ మాట్లాడగలిగే, ఇద్దరి మాటా వినబడే సురక్షితమైన చోటును కౌన్సెలర్ కల్పిస్తారు. కొన్ని సెషన్లు కూడా సహాయపడ్డాయని చాలామంది దంపతులు చెబుతారు.

మీరు కలిసి దాటినవి గుర్తుచేసుకోండి

చాలామంది దంపతులు ఇంతకుముందు కూడా అనారోగ్యం, డబ్బు ఇబ్బందులు, కుటుంబ ఒత్తిళ్లను కలిసి ఎదుర్కొన్నారు. ఇప్పటికే దాటిన సవాళ్లను ఒకరికొకరు గుర్తుచేసుకుంటే, ఈ సంభాషణ అంత భయంగా అనిపించదు — కలిసి పరిష్కరించుకోవాల్సిన మరో సమస్యలా అనిపిస్తుంది.

మిమ్మల్ని మీరు కాపాడుకోండి

మీ బంధంలో మీకు అభద్రతగా, ఒత్తిడిగా లేదా అగౌరవంగా అనిపిస్తే, నమ్మకమైన వ్యక్తి లేదా నిపుణుల సహాయం తీసుకోండి.