లింఫెడెమా చేతిలో సెల్యులైటిస్: ఆలస్యం చేయకూడని వైద్య అత్యవసరం

లింఫెడెమా (చేయి వాపు) ఉన్న చేయి ఎర్రగా, వేడిగా, వాచి, నొప్పిగా మారి, దానితో జ్వరం లేదా వణుకు వస్తే అదే రోజు డాక్టర్‌కు చూపించండి. ఇది సెల్యులైటిస్ (చర్మ ఇన్ఫెక్షన్) కావచ్చు. సకాలంలో యాంటీబయాటిక్స్ ఇస్తే సాధారణంగా అదుపులోకి వస్తుంది.

సెల్యులైటిస్ అనేది చర్మానికి, దాని కింద ఉండే కణజాలానికి బ్యాక్టీరియా వల్ల వచ్చే ఇన్ఫెక్షన్. లింఫెడెమా ఉన్నవారికి, లేదా చంకలో లింఫ్ నోడ్‌లు (గ్రంథులు) తీసినవారికి ఇది వచ్చే అవకాశం ఎక్కువ. ఎందుకంటే లింఫ్ ద్రవం నెమ్మదిగా ప్రవహించడం వల్ల శరీరం బ్యాక్టీరియాను బయటకు పంపడం కష్టమవుతుంది. సెల్యులైటిస్ వేగంగా, కొన్నిసార్లు గంటల్లోనే వ్యాపించవచ్చు. చికిత్స చేయకపోతే తీవ్రమైన అనారోగ్యానికి దారి తీయవచ్చు. ఇది లింఫెడెమాను ఎక్కువ చేసి, భవిష్యత్తులో మళ్లీ ఇన్ఫెక్షన్ వచ్చే అవకాశాన్ని కూడా పెంచుతుంది. చర్మం ఎర్రగా, వేడిగా, వాచి, నొప్పిగా మారడం, తరచూ జ్వరం, వణుకు, ఒంట్లో బాగోలేనట్టు అనిపించడం దీని సాధారణ సంకేతాలు.

ఇది సాధారణంగా ఎలా మొదలవుతుంది?

తరచూ చర్మంలో చిన్న చీలిక ద్వారా: గీరుకోవడం, పురుగు కుట్టడం, గోళ్ల చుట్టూ చర్మం కత్తిరించడం, కాలిన గాయం, లేదా ఎండిపోయి పగిలిన చర్మం. అయితే కొన్నిసార్లు బ్యాక్టీరియా ఎక్కడి నుంచి లోపలికి వెళ్లిందో కనిపించదు.

చికిత్సలో ఏముంటుంది?

తేలికపాటి ఇన్ఫెక్షన్‌లకు యాంటీబయాటిక్ మాత్రలు ఇస్తారు. ఇన్ఫెక్షన్ తీవ్రంగా ఉన్నా, వేగంగా వ్యాపిస్తున్నా హాస్పిటల్‌లో డ్రిప్ ద్వారా యాంటీబయాటిక్స్ ఇస్తారు. విశ్రాంతి, చేతిని ఎత్తుగా పెట్టడం, నొప్పి మందులు కూడా సహాయపడతాయి.

తగ్గిన తర్వాత

మాటిమాటికీ సెల్యులైటిస్ వచ్చేవారికి, వెంటనే మొదలుపెట్టడానికి ఇంట్లో యాంటీబయాటిక్స్ ఉంచుకోమని, లేదా మళ్లీ రాకుండా రోజూ తక్కువ డోస్ వేసుకోమని డాక్టర్లు సూచించవచ్చు.

రోజువారీ చర్మ సంరక్షణే ఇన్ఫెక్షన్ ప్రమాదం తగ్గించడానికి అత్యంత ప్రభావవంతమైన మార్గం.

చర్మాన్ని ఆరోగ్యంగా ఉంచండి

మెల్లగా కడగండి, వేళ్ల మధ్య జాగ్రత్తగా తుడవండి, చర్మం పగలకుండా రోజూ మాయిశ్చరైజర్ రాసుకోండి.

గాయాల నుంచి కాపాడుకోండి

తోట పని, గిన్నెలు కడగడం, శుభ్రం చేయడం లాంటి పనులకు గ్లౌజులు వేసుకోండి. దోమలు, పురుగుల నుంచి రక్షణ క్రీమ్ వాడండి. వంటింట్లో పదునైన కత్తులు, వేడి గిన్నెలతో జాగ్రత్తగా ఉండండి.

చిన్న గాయాలకు వెంటనే చికిత్స

కోతలు, గీతలను వెంటనే నీళ్లు, యాంటిసెప్టిక్‌తో శుభ్రం చేసి, మానేవరకు కప్పి ఉంచండి.

గోళ్లు, పాదాల సంరక్షణ

గోళ్ల చుట్టూ చర్మం (cuticles) కత్తిరించవద్దు. వేళ్ల మధ్య ఫంగల్ ఇన్ఫెక్షన్‌లకు చికిత్స చేయించుకోండి. గోళ్లను కత్తిరించి ఉంచండి.

లింఫ్ వ్యవస్థ ఇన్ఫెక్షన్‌ల నుంచి శరీరాన్ని కాపాడే వ్యవస్థలో ఒక భాగం. అది దెబ్బతిన్నప్పుడు చేయి ఇన్ఫెక్షన్‌లకు సులువుగా లోనవుతుంది.

బ్యాక్టీరియా నెమ్మదిగా బయటకు వెళ్తుంది

లింఫ్ నాళాలు బ్యాక్టీరియాను, వ్యర్థాలను లింఫ్ గ్రంథులకు తీసుకెళ్తాయి. అక్కడ రోగనిరోధక కణాలు వాటిని ఎదుర్కొంటాయి. ఈ ప్రవాహం తగ్గినప్పుడు చర్మం ద్వారా లోపలికి వచ్చిన బ్యాక్టీరియా నెమ్మదిగా బయటకు వెళ్తుంది, పెరగడానికి ఎక్కువ సమయం దొరుకుతుంది.

ప్రొటీన్ ఎక్కువగా ఉండే ద్రవం

లింఫెడెమాలో పేరుకుపోయే ద్రవంలో ప్రొటీన్ ఎక్కువగా ఉంటుంది. బ్యాక్టీరియా పెరగడానికి అది ఉపయోగపడుతుంది.

సాగిపోయిన, సున్నితమైన చర్మం

వాచిన చర్మం ఎండిపోయి, సాగిపోయి, సులువుగా పగలవచ్చు. ఆ పగుళ్ల ద్వారా బ్యాక్టీరియా లోపలికి వెళ్తుంది.

ఈ చక్రాన్ని ఆపాలి

ప్రతి ఇన్ఫెక్షన్ లింఫ్ నాళాలను ఇంకా దెబ్బతీసి వాపు పెంచుతుంది. పెరిగిన వాపు మరో ఇన్ఫెక్షన్ ప్రమాదాన్ని పెంచుతుంది. మంచి చర్మ సంరక్షణ, వాపు అదుపు, ఇన్ఫెక్షన్‌లకు సకాలంలో చికిత్స ఈ చక్రాన్ని ఆపడానికి సహాయపడతాయి.